Ye kaisi subah...??

Aaj jab nind khuli to suraj ko apni khirki se jhankte hue dekha. badi ajeeb si feeling hui .....suraj devta itni agni barsate hai lekin fir bhi ye thandhi ka shaitan bhagne ka nam hi nahi leta...!!

Arrey ha!! thandhi se yaad aaya kal news channel wale bade chatkare le -le kar bata rahe the share market me mandi ka daur jari....market thandha pada... aur na jane kaisi GDP, repo rate aur 'khadya mehengai dar' jaise khatrnak shabdo ke ban chala rahe the. mujh jaise aam admi ko ek bat aj tak samajh me na aai.....sab kuchh thandha aur manda hai phir bhi common people ke liye bazar itna garam kyo hai?

Abhi mere khayalo ki tandra tuti bhi na thi ki shrimati ji ne awaz lagai...".arey!uthoge bhi ya yu hi pura sunday rajai me hi gujar doge?" ye bibia bhi bahut ajib type ki garib chij hoti hai ,lekin aisa ye bachpan se nahi hoti...'bibipan' ya yu kehe 'patniyata' ka labada odhne ke bad inke sampurna personality me abhutpurva parivartan aa jata hai.Aisi bat nahi ki mai patni pratadna ka shikar hu ya mujhe bibi se dar lagta hai lekin ek bat to pakki hai guru! palat ke jawb dene ke pehle sau bar sochna jarur pedta hai...

khair jo bhi ho bibi ki banai chai peete hue aaj kya krna hai isi ke bare me sochta raha tabhi aj dusri bar meri tandra todi gai..."shalu ki sagai me allahabad jane ke bare me kya socha?" ji ha shalu ji mere bibi ki mausi ki ladli hai jo jald hi 'patniyata' ka vrat dharan karne wali hai.

Sagai ki rasm is pavitra andolan ka pehla charan mana jata hai. mai apni patni ko sapat lafjo me na kehne ka sahas nahi juta pa raha tha. darasal uttar pradesh ke chunavi mahasamar ko dekhte huey maine than liya hai ki jab tak mahayudh samapt hone ki ranbheri nahi bajti mai U.P me lat nahi lagaunga. Jane kab kis chaurahe ya road par police wale challan kar de.Arrey Bhaiyo!!police kuch bhi kar sakti hai khas kar jab chunavi achar sahita lagoo ho. Pata laga bibi ke sath ja raha hu aur police ne non bailable arrest warrant jari kar diya 'khatarnak aslaha ke sath giraftar'.

waise bhi U.P me chunaw, mahakumbh aur board exam apne aap me historical events se kam nahi hote.Ab dekh lijiye.....chunavi mahol me bechare patthar ke hathiyo ko lekar international issue bana dia gaya aur thandh se akele U.P me 300 se adhik jinda insano ki maut ko swabhawik maut man liya ja raha hai.Aisa apne yaha hi sambhaw hai ki karodo ki lagat se banaye gaye health centre aj bhusa aur puwal ke godam bane hue hai.

Sorry.....mai jara jyada hi bhavnao me bahe ja raha tha wo to bhala ho ganpat ka jiske awaz se meri tandra aj teesri bar tooti. 'ganpat' hamare mohalle ka gabru jawan hai jo netagiri karne ke sath ek laundry bhi chalata hai....

shesh agle bhag me.....